The Franklin's Tale
Folio 292r
10 of 21 folios
Vndyr his brest he bar it sore
And so fer forth it greuede hym \the/ moore
Than euere dede Pampli ë or Galatheene
His brest was sor wt outyn for to sene
But in his herte ay was the arwe kene
405
And weel ȝe knowe that of a sursanure
In surgerye is perlious the cure
But men myȝte tuche the arwe or come therby
His brothir wep & waylede pryuyly
Til at the laste hȳ fil in remembraūce
410
That whil he was at orlionys in fraūce
As ȝonge clerkis that been likerous
To rendyn artis that been curious
Sekin in eueri halk & euery herne
Particuler sciencis for to lerne
415
He hȳ remēbrede that vp on a day
At orlionys in stodie he say
Of magyk naturel whiche that his felawe
That was that tyme a bacheler of lawe
Al were he there to lerne a nothir craft
420
Hadde piuyly vp on his deske laft
Swich book that spak meche of the operacioūnys
Touchȳge the eyghte & twenty mancioūnys
That longȳ to the moone & swich folye
425
For holycherchis feyth in oure beleue
Ne suffere noone illusioūnys vs to greue
And whā this bok was in remembraūce
A noon for ioye his herte gan to daūce
And to hȳ self he seyde pryuyly
430
Myn brother schal been war\shit/ hastily
For I am sekyr that theere ben sciencis
By whiche men mak diuers apparencis
Sweche as these subtyle tregettourys pleye
For ofte at festis / haue I weel herd seye
435
That tregettouris wt inne an halle large
Haue mad come in a watyr & a barge
And in the halle rowyn vp & doū
Sūtyme haue semyd to come a grym lyoū