The Franklin's Tale
Folio 292v
11 of 21 folios
And sūtyme flouris sprynge as in a mede
440
Sūtyme avine & grapis white & reede
Sūtyme a castel al of lym & stoon
And whā hȳ lykith woydede it a noon
Thus semede it to euery manys syȝt
Now thāne cōclude I thus as ȝif I myght
445
At orlyonys sū old felaue I fynde
That hadde these monys mācioūnys in mynde
Or othere Magyk naturel a boue
He schulde weel make myn brothir han his love
For with apparens a clerk may make
450
To mānys syȝt that alle the rokkis blake
Of Brytaygne were voydede euerychō
And schippis by the brynke comyn & goon
And in swich forme endure a day or two
Thāne were mȳ brothir warsched of his woo
455
Thāne muste sche nedys holdyn hyre by heste
Or ellis he schal schame hire at the leste
What schulde I make a lengere tale of this
Vnto hise brotheris bed he comyn is
And swich confort he ȝaf hȳ for to goon
460
To Orlyonys that he vp styrte a noon
And in his weye forward is he fare
In hope for to been lessede of his care
Whan they were come / almost to that cete
But ȝif it were a two furlong or thre
465
A ȝong clerk romynge by hȳ self he mette
Whiche that in latyn thryftily hȳ grette
And aftyr that he seyde a wondyr thyng
I knowe quod he the cause of ȝoure comyng
And er they ferthere ony foote wente
470
He told hē al that was in here entente
This Britoū Clerk hȳ askede of felawys
The whiche // had // hē knowe of olde dawis
And he answerde hē that they dede were
For which he wepte ful ofte manye a teere
475
Doū of his hors Aurelyus lyȝte a non
And with this Magicien forth is he gon