The Knight's Tale
Folio 14v
59 of 63 folios
But onward on his way þat night he lay
And sente anon ypolita þe queene
And Emelye hir ȝonge suster scheene
115
Vnto þe toun of Athenes to dweƚƚ
And forþ he ritte þer nys namore to telle
The rede Statue of Mars with spere and targe
So schineþ in his white baner large
That alle þe feelde gliteren vp and doū
120
And by his baner born is his pynoun
Of gold ful riche in which þer was y bete
The Mynataur which þat he wan in Grece
Thus rit þis duk þus rit þis conquerour
And in his host of Chiuallerie þe flour
125
Til þat he come to Thebes and alight
Faire in þe feeld þer as he þought to figħt
But schortly for to speken of þis þing
With Creon which þat was of Thebes king
He faugħt and slougħ him manly as a knigħt
130
In pleyn bataile and putte þe folk to fligħt
And by assent he wan þe Cite after
And rente adoun boþe waƚƚ and sparre and rafter
And to þe ladies he restored ageyn
The bones of here frendes þat were slayn
135
To don obsequies as was þo þe gyse
But it were aƚƚ to longe to deuyse
The grete clamour and þe waymentyng
That the ladys made atte brennyng
Of þe bodies and þe gret honour
140
That Theseus þe noble conquerour
Doþ to þe bodies whan þei from him wente
But schortly for to telle is myn entente /
Whan þat þis worþi duk þis theseus
Haþ Creon slayn and wonne Thebes þus
145
Stille in þat feeld he took al night his reste /
And dide with aƚƚ þe contre as him leste
To ransake in þe caas of þe bodies deede