The Nun's Priest's Tale
Folio 368v
8 of 14 folios
Affermyth dremys & seyth that they been
Warnynge of thȳgis that men aftyr seen
And ferthere more I prey ȝow lokyth weel
In the olde testement of danyel
310
Ȝif he helde dremys ony vanyte
Redyth ek of Iosep & there ȝe schul se
Wheere dremys ben sūtyme I seye nat alle
Warnynge of thȳgis that schul aftyr falle
Loke of Egip the kyng daū pharao
315
His bakere & his boteler also
Wheere they ne feltyn non effect in dremys
Who so wele seke actis of sūdry remys
May reede of dremys manye a sundery thyng
Lo Cresus that was of lide kyng
320
Mette he nat how that he sat vp on a tre
Whiche signefyed anhāgid schulde bee
Lo heere Andromatha ectoris wif
That day that Ector schulde lese his lyf
Sche dremede on the same nyght byforē
325
How that the lyf of Ector schulde been loryn
Ȝif thilke day he wēte in to batayle
Sche warnede hȳ but it myghte nat auayle
He wente for to fyghte netheles
But he was slayn a noon of Achilles
330
But tylke tale is al to long to telle
And ek it is nygh day I may nat dwelle
Certeynly I seye as for conclusioū
That I schal han of this auysioun
Aduersite / & I seye ferthere moore
335
That I ne telle of laxatyuys no store
For they been venimes I wot it weel
I hē defye I loue hem neuere adeel
Now lat vs speke of myrthe & stynte al this
Madame pertelote so haue I blys
340
Of on thyng god hath sent me large grace
For whāne I se the the beute in ȝoure face
Ȝe been so skarlet red a boute ȝoure eyen
It makyth al myn dred / for to deyen ~