The Nun's Priest's Tale
Folio 368r
7 of 14 folios
Gan for to lauhe & skornde hȳ ful faste
No drē quod he may so myn herte agaste
270
That I wele lette for to do myne thȳgis
I sette not a straw / by thȳne dremȳgis
For dremys been but uanyteis & Iapis
Men / dreme al day of oulis & of apis
And of manye a mase there withal
275
Men dreme of thyng that neuere was ne schal
But sithe I se that thow wild heere a byde
And thus for slouthen / wilfully thȳ tyde
God wot it rewith me / & haue good day
And thus he tok his leue & wēte his way
280
But er that he hadde half his cours I seyled
Not I not why / ne what myschaūce it eyled
But casewelly / the schipis boteme it rente
And schip & man vndyr the watyr wente
In sight of othere schepis besyde
285
That with hē seyled at the morwe tyde
And therefore fayre pertelote so deere
By sweche ensaūplis olde mayst thow leere
That no man schulde been to recheles
Of dremys for I seye the douteles
290
That manye a drem / ful soore is for to drede
Lo in the lyf of seynt kenelm I reede
That was kenulphus sone the noble kyng
Of Merturyke how kenelm mette a thyng
A lite er he was mordered on a day
295
His mordere in his auysioū he say
His noryce hȳ expoungnede euerydel
His sweuene / & bad hȳ / for to keepe hȳ weel
Frō tresoun but he was but seuene ȝeer old
And therfore lytil taale hath he told
300
Of any drem so holy was his herte
By god I hadde leuere thā myn scherte
That ȝe hadde rad his legende as haue I
Dame pertelote I seye ȝow trewely
Macrobeus that wret thauysioū
305
In Affryk of the worthi Cipioun