The Nun's Priest's Tale
Folio 251v
10 of 19 folios
For tresoū but he was seuen ȝeer old
And þerfore litel tale haþ he told
Of eny dreem so holly was his herte
300
By god I hadde leuer þan my scherte
Þat ȝe hadde herde his legende as haue I
Dame pertelote I say ȝou trewely
Macrobeus þat writ þe avisioun
In affryke of þe worþy Cyprioun
305
Affermeþ dremes and saiþ þat þay ben
Warnyng of þinges þat men after seen
And furþermore I pay ȝou lokeþ wel
Þe olde testament of Daniel
If he heeld dreemes of any vanyte
310
Reede eek of Ioseph and þer schuln ȝe see
Wheþer dremes ben som tyme I say not aƚƚ
Warnyng of þinges þat schuln aft er faƚƚ
Loke of Egypt þe king daun Pharao
His baker and his botiler also
315
Wher þey ne felten noon effecte in dremes
Who so wol seche þe acte of sondry Remes
May rede of dreemes many a wonder þing
Lo Cresus which þat was of lyde king
Mette he nouȝt þat he sat on a tree
320
Which signified he schulde anhanged be
Lo here adromacha Ectores wiff
That day þat Ector schulde lese his lyff
Sche dreemed on þe same night byforn
How þat þe lyff of Ector schulde be lorn
325
If þilke day he went in to Batayle
Sche warned him but it migħt nouȝt auayle
He wente for to feighten neuer þe les
But he was slayn of oon achilles
But þilke tale is al to long to telle
330
And eek it is neigh day I may nouȝt dwelle
Schortly I say as for conclusioū
Þat I schal haue of þis auisioū