The Nun's Priest's Tale
Folio 252r
9 of 19 folios
Of aduersitees and I say forþermore
That I nel telle of laxatifs no store
335
For þey ben venymous I wot right wel
I hem diffye I loue hem neuer a del
Now let vs speke of myrþe and stynte al þis
Madame pertelote so haue I blis
Of o þing god me haþ sent large gace
340
For when I se þe beaute of ȝour face
Ȝe ben so skarlet reed aboute ȝoure eyen
It makeþ aƚƚ my drede for to deyen
For al so siker as In principio
345
Ma dame þe sentence of þis latyn is
Wōman is mannes ioye and al his blys
For whan I feele a nigħt ȝoure softe syde
Al be it þat I may nougħt on ȝou ryde
For þat oure perche is maad so narwe allas
350
I am so fulle of ioye and solas
That I diffye boþe sweuen and dreem
And wiþ þat word he fleigħ doun fro þe beem
For it was day and eek his hennes aƚƚ
And wiþ a chukke he gan hem for to caƚƚ
355
For he had founde a corn lay in þe ȝerde
Real he was nomore aferde
He feþerede pertelote twenty tyme
And tradde as ofte er it were pime
He lokeþ as it were a grym lyoū
360
And on his toos he romed vp and doū
Him deygned nouȝt to sette his feet on grounde
Ay chukked he whan he hadde a corn y founde
And to him þanne ranne his wyfes aƚƚ
Þus real as a prince in his halle
365
Leue I þis Chaunteclere in his pasture
And after wol I telle of his aduentur
When þe monþe in which þe world bigan
Þat highte march when god ferst made man