The Friar's Tale
Folio 72r
8 of 11 folios
The deuel haue al bothe hors and cart and hey
¶ The Sompner seyde here shul we han a pley
And nerre the fende he drowe as noght ne were
250
Ful piuely he rouned in his ere
Herken my brother herken bi my feith
Herstow what the Carter seyth
Hent hit anon for he hath yeue it the
Bothe hey and cart and eke his caples thre
255
Nay quod the deuel god wot neuyr a del
It is nat his entent tristow me wel
Axe him thi selfe yif thow nat trowest me
Or elles stynte a while and thow shalt Se
260
¶ This carter taketh his hors vpon the crowpe
And thei bigonne to drawen and to stoupe
Hayte now quod he ther Iħu crist yow blesse
And al his hondes werke bothe more and lesse
That was wel twyght myn owne lyard boy
265
I prey god saue thi body and seint loy
Now is my cart oute of the slough parde
Lo brother quod the fende what told I the
Here may ye seen myn owne dere brother
The carle spak o thing and ment another
270
Lat vs go forth aboute our viage
Here wynne I no thing vpon cariage
¶ Whan that thei comen som what out of toun
This Sompnour to his brother gan to roune
Brother quod he here wonneth an olde rebekka
275
That had almoost as lief to lese hir nekke
As for to yeue a peny of hir good
I wol haue xij. pens . thogh that she be wood
Or I wol sompne hir to our office
And yit god woot of hir know I no vice
280
But for thou canst not as in this contre
Wynne thi cost take here ensample bi me
This sompnour clappeth at the widwes gate
Come out quod he thow olde viritrate .