The Friar's Tale
Folio 71v
7 of 11 folios
210
As to the phitonissa did samuel
And yit wol som men sey it was noght he
I do no force of your dyuynyte
But o thing warne I the I wil noght Iape
Thow wolt algates wite how we ben shape
215
Thow shalt here afterward my brother dere
Come where the nedyth noght of me to lere
For thow shalt by thyn owne experience
Konne in a chaire rede of this sentence
Bet than virgile while he was on lyue
220
Or dant also now lat vs ryde blyue
For I wol holde compaignye wyth the
Til it be so that thow forsake me
¶ Nay quod this Sompnour that shal neuer bityde
I am a yoman that knowen is ful wide
225
Mi trouthe wol I holde as in this cas
For thogh thow were the deuel Sathanas
Mi trouthe wil I holde to the my brother
As I am sworne and eche of vs to other
For to be trew brother in this cas
230
And bothe we gon aboute our purchas
Take thou thi part what that men wol the yeue
And I shal myn thus may we bothe leue
And yif that any of vs haue more than other
Lat him be trew and parte it wyth his brother
235
¶ I graunte quod the deuel by my fey
And wyth that word thei riden forth hir wey
And rygh at the entryng of the tounes ende
To which this Sompnour shope him for to wende
Thei seigh a cart that charged was wyth hey
240
Which that a carter drof forth in his wey
Depe was the wey for which the cart stood
The carter smot and cride as he were wood
Hayte brok hayte scot what spare ye for the stones
The fende quod he yow fecche body and bones
245
As ferforthly as euer were ye foled
As mochel wo as I haue wyth yow tholed