The Canon's Yeoman's Tale
Folio 172v
3 of 21 folios
As bol armoniak verdegres boras
And sondry vessels maad of erþe and glas
Oure vrinals and oure descensories
Viols Croslets and sublimatories
75
Concurbites and alembikes eeke
And oþere suche deere ynougħ a leeke
Nat needith it to rehersen hem alle
Watres rubisyng and boles galle
Arsnek Sal armoniak and brimstoon
80
And herbes couþe I telle eek many oon
As Egrimoigne valirian and lunarie
And oþer suche if þat me list to tarie /
Oure lampes brennyng boþe night and day
To bringe aboute oure craft if þat we may
85
Oure fourmes eek of Calcinaciou~
And of watres albificaciou~
Vnslekked lym salt and glayre of an ey
Poudres dyuers aissches dong pisse and cley
Cered poketts . Sal petre vitriole
90
And dyuers fuyres maad of woode and cole /
Salt tartre alcaly and salt preparat
And combust matieres . and coagulat
Cley maad wiþ hors or mannes her and oyle
Of tartre alym . glas . berm wort and argoyle
95
Resalgar and oure matiers enbibing
And eek of oure matiers encorporing
Oure cementynge and fermentaciou~ /
Oure yngottes testes and many mo
100
I wol ȝou telle as was me taugħt also /
The foure spiritz and þe bodies seuen
By ordre as ofte herd I my lord neuen
The firste spirit quyksiluer called is
The secound orpiment þe þridde I wis
105
Sal armoniac . and þe ferþe bremstoon
The bodies seuen eek lo hem heer anoon
Sol gold is and luna siluer we þrepe
Mars . yren . Mercurie quyksiluer we clepe Saturnë