The Pardoner's Prologue & Tale
Folio 310v
12 of 16 folios
Thanne were we in high felicite
460
But treweli by day it may nat be
Men woldȳ seyn that we were thevis stronge
And for oure owene tresore doon vs honge
This tresore muste I caryede been by nyght
As wysely & as slyly as men myght
465
Therefore I rede that cut a mong vs alle
Be drawe & lat se where the cut wele falle
And he that hat the cut wt herte blythe
Schal renne to toūne & that ful swythe
And brynge vs breed & wyn ful pryuyly
470
And two of vs schal kepen subtily
This tresor wel / if he wele nat tarye
Whan it is nyght we wele this tresore carye
By on assent / where as vs thȳkyth best
That on of hē the Cut brouȝte in his fest
475
And bad hem drawe & loke wheere it wolde falle
And it fel on the ȝongest of hē alle
And forth toward the toū he wente a non
And al so soone as // he // þt was goon
That oon of hem spak on to that othyr
480
Thow knowyst weel thow art myn swore brothir
Thyn profyt wele I telle the a noon
Thow wist weel that oure falawe is goon
And heere is gold & that ful greet plentee
That schal departid be a mong vs three
485
But natheles If I can speke it so
That it departyd were a mong vs two
Hadde I nat doon a frendys turn to thee
That othir answerde I not how that may bee
He wot that the gold is with vs tweye
490
What schal we do what schal we to hym seye
Schal it be conseyl seyde the ferste schrewe
And I schal tellyn in a wordys fewe
What we schal doon & brynge it weel a boute
I graūte quod that othyr out of doute
495
That by myn trouthe I wele the nat by wrye
Now quod he thow wost weel that we bē twye