The Summoner's Tale
Folio 122r
16 of 18 folios
A dagoun of ȝour blanket leeue dame
Oure suster deere here I write ȝoure name
45
Bacoū or beef or such þing as ȝe fynde
A sturdy harlot wente hem ay behynde
That was here hostes man and bar a sakke
And what men ȝaf hem leyde it on his bakke
And whan he was out at þe dore anoon
50
He planed awey þe names euerychoon
That he bifore hadde writen in his tables
He serued hem with nyfles and with fables
Nay þer þou lixt þou somnor quod þe frere /
Pees quod oure host for cristes moder deere
55
Telle forþ þi tale spare it not at al
So þryue I quod þis somnor so I schal
So longe he wente hous by hous quod he
Til he come to an hous þer he was wont to be
Refresshed more þan in an .C. places
60
Seke lay þe bonde man whos þe place is
And vpon a kowche lowe he lay
Deus hic quod he / O Thomas frend good day
Seyde þis frere curteysly and softe
Thomas sayde he god ȝelde ȝow ful ofte
65
Haue I vpon þis benche faren wel
Heere haue I eten many a mery meel
And fro þe benche he drof awey þe cat
And leyde doun his potent and his hat
And eek his scrippe and sette him softe a doun
70
His felawe was go walked in þe toun
Forþ with his knaue in to þat ostelrie
Wher as he schop him þilke night to lye
O deere maister quod þis seeke man
How han ȝe fare siþenes þat marche bigan
75
I say ȝow nougħt þis fourtenigħt and more
God woot quod he laboured haue I ful sore
And specially for þy Saluacioū
Haue I seyde many a percious orisoū