The Man of Law's Tale
Folio 87v
6 of 31 folios
And wiþ þe Senatour sche ladde hir lyf
Thus kan oure lady bringen out of woo
880
Woful Custance and many anoþer mo
And long tyme dwelled sche in þat place
In holy werkes euere as was hir grace
¶ The Senatoures wijf hir aunte was
But for al þat sche knew hir neuer þe more
885
I wil no lenger tarien in þis caas
But to king Alla which I spak of yore
That for his wyf wepeþ and sikeþ sore /
I wol retorne and lete I wil Custance
Vnder þe Cenatoures gouernance /
890
¶ Kyng Alla . which þat hadde his moder slayn
Vpon a day fil in such repentance
That if I schortly tellen schal and playn
To Rome he comeþ to receyuen his penance
And put him in þe popes ordinance
895
In heigh and low and Ihū crist besoughte
Foryeue his wikkede werkes þat he wroughte
¶ The fame ano þurgh Rome toun is born
How Alla king schal comen in pilgrinage
By herberiours þat wenten him biforn
900
For which þe Senatour as was vsage
Rood him agayn and many of his lynage
As wel to schewen his hie magnificence
As to don any king a reuerence
¶ Gret cheere doth þis noble Senatour
905
To king Alla and he to him also
Euerich of hem doþ oþer gret honour
And so bifiƚƚ þat in a day or tuo
This Senatour is to king alla go
To feeste and schortly if I schal not lye
910
Custance sone is in his companye /
¶ Som men wolde seyn atte requeste of Custance
This Senatour haþ lad þis child to feste
I may not tellen euerich circumstance /