The Knight's Tale
Folio 16v
55 of 63 folios
And with þat sigħt hir beaute hurt him so
That if þat Palamon was wounded sore
Arcite is hurt as muche as he or more /
And with a syke he seyde pitously
260
The freissche beaute sleþ me sodeinly
Of hire þat rometh in þe yonder place
And but I haue hir mercy and hir grace
That I may seen hir atte leste wey
I nam but ded þer nys no more to sey
265
This Palamon whan he þis wordes herde
Dispitously he loked and answerde
Wheþer seistow þis in ernest or in pleye
Nay qd arcite in ernest by my feye
God helpe me so me lust ful yuel playe
270
This Palamon gan knet his browes twaye
It were to þe quod he no gret honour
For to be fals ne for to be traytour
To me þat am þi cosyn and þi broþer
Y sworn ful deepe and ech of vs til oþer
275
That neuer for to deyen in þe payn
Til þat þe deþ departe schal vs twayn
Neither in loue for to hinder oþer
Ne in non oþer cas my lieue broþer
But þat þou scholdest trewly forþer more
280
In euery caas and I schal forþre þe þore
This was þin oþ and myn also certeine
I wot right wel þou darst it not wiþ seyne
Thus art þou of my counseil out of doute
And now þou woldest falsly ben aboute
285
To loue my lady whom I loue and serue
And euer schal til þat myn herte sterue
Now certes fals Arcite þou schalt not so
I loued hir ferst and tolde þe my wo
As to my counseil and my broþer sworn
290
To forthre me as I haue told biforn
For which þou art y bounden as a knigħt / To helpe