The Second Nun's Tale
Folio 168v
7 of 16 folios
xhan this was rad / thanne seyde this olde man
Leuestow this thyng or no / sey ye / or nay
I leue al this thyng quod Valerian
For sother thyng than this / I dar wel say
215
Vnder the heuene / no wight thynke may
Tho vanysshed this olde man / he nyste where
And pope Vrban / hym cristned right there
¶ Valerian goth hom / and fynt Cecilie
In with his chambre / with an Aungel stonde
220
This Aungel hadde / of Roses and of lilie
Corones two / the whiche he bar in honde
And first to Cecile / as I vnderstonde
He yaf that oon / and after gan he take
That oother / to Valerian hir make
225
¶ With body clene / and with vnwemmed thoght
Kepeth ay wel / thise corones quod he
Fro Paradys / to yow / haue I hem broght
Ne neuere mo / ne shal they roten be
Ne lese hir swote sauour / trusteth me
230
Ne neuere wight shal seen hem wt his eye
But he be chaast / and hate vileynye
¶ And thow Valerian / for thow so soone
Assentedest to good conseil also
Sey what thee list and thow shalt han thy boone
235
I haue a brother / quod Valerian tho
That in this world / I loue no man so
I pray yow / that my brother may han gace
To knowe the trouthe / as I do in this place
¶ The Aungel seyde / god liketh thy requeste
240
And bothe / with the palm of martirdom
Ye shullen come / vn to his blisful feste
And with that word / Tiburce his brother coom
And whan that he / the sauour vndernoom
Which þt the Roses / and the lilies caste
245
With Inne his herte / he gan to wondre faste