The Knight's Tale
Folio 29r
13 of 58 folios
And as the gyse was / in his contree
1280
Ful hye / vp on a Chaar of gold stood he
With foure white Boles / in the trays
In stide of Cotearmure / ouer his harnays
With nayles yelwe / and brighte as any gold
He hadde a Berys Skyn / colblak / for old
1285
His longe heer / was kembed bihynde his bak
As any Rauenes fethere / it shoon for blak
A wrethe of gold / greet of huge wighte
Vp on his heed / and ful of stones brighte
Of fyne Rubyes / and of dyamaūtz
1290
Aboute his Chaar / ther wente white Alauntz
Twenty and mo / as grete as any steer
To hunten at the leou / and the deer
And folwed hym / wt mosel faste ybounde
Colered of gold / and turrettes filed rounde
1295
An hundred lordes / hadde he in his route
Armed ful wel / with hertes stierne and stoute
¶ With Arcita / in stories as men fynde
The grete Emetrius / the kyng of Inde
Vp on a Steede bay / trapped in steel
1300
Couered in a clooth of gold / dyapred weel
Cam ridynge / lyk the god of Armes Mars
His cote armure / was of clooth of Tars
Couched wt perlys white / and rounde and grete
His sadel was / of brend gold newe ybete
1305
A Mantelet vp on his shulder hangynge
Bretful of Rubies reede / as fyr sparklynge
His crispe heer / lyk rynges was yronne
And that was yelow / and glitred as the sonne
His nose was heigh / hise eyen bright Citryn
1310
His lyppes rounde / his colour was sangwyn
A fewe fraknes / in his face yspreynd
Bitwixen yelow / and som del blak ymeynd
And as a leou / he his lookyng caste
Of . xxv. yeer / his age I caste
1315
His beerd / was wel bigonne for to sprynge
His voys / was as a trompe thonderynge
Vp on his heed / he wered of laurer grene
A gerland fressħ / and lusty for to seene