The Pardoner's Prologue & Tale
Folio 192v
15 of 18 folios
Whils þou strogelest wiþ him as in game
And with þi dagger loke þou do þe same
And þan schal al þe gold departed be /
My dere frend bitwixe þe and me
505
Than may we oure lustes fulfille
And play at dees right at oure owne wille /
And þus accorded ben þese schrewes twayn
To sle þe þridde . as ȝe herd me sayn /
This ȝongest which þat wente to þe toun
510
Ful fast in hert he rollith vp and doun
The beaute of þe florins newe and brigħt
O lord quod he if so were þat I migħt
Haue al þis gold vnto my self alloone
Ther is no man þat lyueþ vnder þe troone
515
Of gold þat schulde lyue so mery as I
And atte last þe feend oure enemy
Put in his þought þat he schuld poysoū beye
Wiþ which he mighte sle his felaws tweye
For why þe feend fond him in such lyuynge
520
That he had leue to sorwe him to brynge
For þis witterly . was his entent
To slen hem boþe and neuer to repent
And forth he goþ no lenger wold he tary
In to þe toun vnto a potecary /
525
And prayde him þat he him wolde selle
Som poysoun þat he migħt his rattis quelle
And eek þer was a polkat in his hawe /
As he sayde his capouns had I slawe /
And said he wold him wreke if þat he migħt
530
On vermyn þat destroyed him by night
Thapotecary answerd and þou schalt haue
A þing þat also god my soule saue
In al þis world þer nys no creature
That ete or dronk had of þis confecture
535
Nougħt but þe mountaunce of a corn of whete
That he ne schuld his lif anoon forlete /
Ȝe sterue he schal and þat in lasse while
Than þou wilt goon a paas not but a myle /