schuln be more largely declared in here chapitres folwynge
AFter enuye wol I descryuen þe synne of Ire . For
soþely who so haþ enuye vpon his neighebor ; a-
noon he wol comunly fynde him a matiere of
wraþþe in word or in dede agayns hī to whom he haþ en-
vie .
460
and as wel comeþ Ire of pride as of enuye ¶ For soþly
he þat is proud or enuyous is lightly wroth .
þis synne of
Ire after þe descryuyng of seint austyn is wikked wille
to ben auengid by word or by dede
¶ Ire afte þe philosofer
is þe feruent blood of man I quiked in his hert þurgh which
he wolde harm to him þat him hatiþ
¶ For certes þe hert
of man by eschawfyng and mornyng of his blood waxith
so trouble / þat he is out of alle Iuggements of resoū
But
ȝe schal vnderstonde þat ire is in tuo maneres . þat oon of hē
is good . þat oþer is wikke
465
¶ The goode Ire is by ialousy of good-
nesse þurgħ which a mā is wroþ with wikkidnes . and þerfore
saith a wise man þat ire is bet þan play .
This Ire is with
deboneirete . and it is wroþ wiþoute bitternes . not wroþ wt
þe man ; but wroþ with þe mys dedes of þe mā as saiþ þe
prophet dauid ¶ Irascimi & nolite per & c
¶ Now vnderstonde
þat wikked Ire is in tuo maners þat is to sayn sodeyn Ire or
hastif Ire wiþoute auysemēt and consenting of resoū .
the me-
nynge and þe sentence of þis is þt þe resoū of a man ne cō-
sentith not to þilke sodein Ire . And þanne is it venial
¶ anoþer
Ire is ful wicked þat comeþ of felony of herte auysed & cast
biforn with wickid wille to do vengeaūce and þerto his re-
soun consentith . and sothely þis is deedly synne .
470
þis ire is so
displesaunt to god þat it troublith his hous and chaceth þe
holy gost out of mānes soule and wastith and destroyeth
þe liknes of god . þat is to say þe vertu þat is ī mānes soule
and put in him þe likenes of þe deuel and bynymeth þe mā
fro god þat is his rightful lord
¶ This Ire is a ful greet
plesaunce to þe deuel . for it is þe deueles fornays þat is es-
chaufid wiþ þe fuyr of helle
¶ For certes right so as fuyr
is more mighty to destroye erþely þinges þan eny oþer ele-
ment ; Rigħt so Ire is mighty to destroye aƚƚ spirituel þīgis
¶ loke how þat fuyr of smale gledis þat ben almost dede
vnder asshen wolden quiken agayn whan þay ben touched