The Second Nun's Tale
Folio 165v
8 of 15 folios
260
Tyburce answerde says þou þus to me
In soþenes or in drem I herkne þis
In dremes quod valirian han we be
Vnto þis tyme broþer myn I wys
And now at erst in trouþe oure duellyng is
265
How wost þou þis quod tyburce and in what wise
Quod valirian þat schal I þe deuyse
The aungel of god haþ me trouþe y taugħt
Which þou schalt seen if þat þou wilt reneye
The ydols and be clene and elles nouȝt
270
And of þe miracles of þese corones tweye
Seynt ambrose in his prefas list to seye
Solempnely þis noble doctour deere
Comendeþ it and saiþ in þis maneere
The palme of martirdom for to receyue
275
Seynt Cecilie fulfilled of goddes ȝifte
The world and eek hir chamber gan sche weyue /
Witnes tyburces and Cecilies schrifte
To whiche god of his bounte wolde schifte
Corounes tuo of floures wel smellynge
280
And made his aungel home þe croune brynge
The mayde haþ brought þis men to blisse aboue /
The world haþ wist what it is worþ certeyn
Deuocioū of chastite to loue /
Tho schewed him Cecilie al open and pleyn
285
That aƚƚ ydoles nys but þing in veyn
For þay ben doumbe and þerto þey ben deue
And chargeþ him his ydoles for to leue
Who so troweþ not þis a best he is
Quod tyburce if þat I schal not lye
290
And sche gan kisse his brest þat herde þis
And was ful glad he couþe trouþe espye
This day I take þe for myn allye
Sayde þis blisful faire mayde deere /
And after þat sche sayde as ȝe may heere
295
Lo right as þe loue of Crist quod sche
Made me þy broþeres wyf right in þat wyse /
Anoon for myn allye heer take I þe /