The Nun's Priest's Tale
Folio 241v
8 of 16 folios
But on a day agayn þe euen tyde
The wynd gan chaunge and rigħt as him list
Iolyf and glad þey wentē vnto rest
255
And casten hem ful erly for to sayle
But herkneþ to þat oon man fel a gret meruayle
That oon of hem in his slepyng as he lay
Him met a wonder drem a gayn þe day
Him þougħt a man stood by his beddes syde
260
And him comaunded þat he schuld abyde
And sayd him þus if þou to morwe wende
Thow schalt be dreynt my tale is at an ende
¶ He wook and told his felaw what he mette
And prayde him his viage to lette
265
As for þat day he prayd him to abyde
His felaw þat lay by his beddis syde
Gan to lawgh and scorned him ful fast
No dreem quod he may so myn herte gaste
That I wil lette for to do my þinges
270
I sette not a straw by þy dremynges
For sweuens been but vanitees and iapes
Men dreme al day of owles and of apes
And of many a mase þer with al
Men dreme of þinges þat neuer be schal
275
But sith I see þat þou wilt her abyde /
And þus forslouthe wilfully þy tyde
God wot it reweth me and haue good day
And thus he took his leue and went his way
But er he hadde half his cours I sayled
280
Noot I nouȝt why . ne what meschaunce it ayled
But casuelly þe schippes bothom rent
And schip and man vnder þe watir went
In sight of oþer schippes þer byside
That with him sailed at þe same tyde
285
And þerfore faire pertelot so deere
By such ensamples olde maistow leere
That no man scholde be to recheles
Of dremes for I say þe douteles
That many a dreem ful sore is for to drede