The Franklin's Tale
Folio 129v
13 of 20 folios
As been his centris / and Hise Argumentz
570
And hise proporcioneles conuenientz
For hise equacions / in euery thyng
And by his .8. speere in his wirkyng
He knew ful wel / how fer Alnath was shoue
Fro the heed / of thilke fixe Aries aboue
575
That in the .9. speere considered is
Ful subtilly / he hadde kalkuled al this
¶ Whan he hadde founde / his firste mansioū
He knew the remenaūt by proporcioū
And knew the arisyng of his moone weel
580
And in whos face / and terme and euerydeel
And knew ful weel / the moones mansioū
Acordaunt to his operacioū
And knew also hise othere obseruaūces
For swiche illusioūs / and swiche meschaūces
585
As hethen folk / vseden in thilke dayes
For which / no lenger maked he delayes
But thurgħ his magik / for a wyke or tweye
It semed / that alle the Rokkes were aweye
¶ Aurelius / which þt yet despeired is
590
Wher he shal han his loue / or fare amys
Awaiteth nygħt and day / on this myracle
And whan he knew / þt ther was noon obstacle
That voyded were / thise Rokkes euerychon
Doun / to hise Maistres feet he fil anon
595
And seyde / I woful wrecche Aurelius
Thanke yow lord / and lady myn Venus
That me han holpen / fro my cares colde
And to the temple / his wey forth hath he holde
Wher as he knew / he sholde his lady see
600
And whan he saugħ his tyme / anon rigħt hee
With dredful herte / and with ful hūble cheere
Salewed hath / his souereyn lady deere
My rigħte lady / quod this woful man
Whom I moost drede and loue as I best kan
605
And lothest were / of al this world displese
Nere it þt I for yow / haue swich disese
That I moste dyen heere / at youre foot anon
Noght wolde I telle / how me is wo bigon
But certes / outher moste I dye or pleyne
610
Ye sle me giltlees / for verray peyne
But of my deeth / thogħ þt ye haue no routhe
Auyseth yow / er þt ye breke youre trouthe
Repenteth yow / for thilke god aboue
Er ye me sleen / by cause þt I yow loue
615
For madame / wel ye woot what ye han higħt
Nat þt I chalange / any thyng of rigħt