The Tale of Gamelyn
Folio 63v
1 of 26 folios
So longe was Gamelyn in his broþeres halle .
For þe strengeste of good þei douteden him aƚƚ
Ther was non þer Inne nowþer ȝong ne olde
80
That wolde wraþþe Gamelyn were he neuer so bolde
Gamelyn stood on a day in his broþeres ȝerde /
And bygan with his hond to handlen his berde
He þought on his londes þat layen vnsawe
And his faire Okes þat doun were drawe
85
His parkes were broken and his deere reued
Of aƚƚ his goode steedes non was him bileued
Hise houses were vnhiled and ful yuel digħt
Tho þoughte Gamelyn it wente nought aright
Afterward cam his broþer walkynge þare
90
And seyde to Gamely is our mete yare
Tho wraþþed him Gamelyn and swor by goddes book
Þou schat go bake þi self I wol not be þi cook
How broþer Gamelyn how answerest þou now
Thou spake neuer such a word as þou dost now
95
By my faiþ sayde Gamelyn now me þinkeþ neede
Of aƚƚ þe harmes þat I haue I took neuer are heede
My parkes ben y broken and my deer bireued
Of myn armure and my steedes nought is me bileued
Alle þat my fader me biquaþ al goþ to schame
100
And þer fore haue þou goddes curs broþer by þy name /
Thanne bispak his broþer þat rape was of rees
Stond stille gadelyng and hold right þi pees /
Thou schalt be fayn for to haue þi mete and þi wede
What spekest þou Gamelyn of lond oþer of leede
105
Than seyde Gamelyn þe child þat was ying
Cristes curs mote he haue þat clepeþ me gadelyng
I am no worse gadelyng ne no worse wigħt
But born of a lady and geten of a knigħt
Ne durste he not to Gamelyn neer a foote go
110
But clepede to him his men and seyde to hem þo
Goþ and beteþ þis body and reueþ him his wit /
And lat him lere anoþer tyme to answer me bet