The Knight's Tale
Folio 29v
30 of 63 folios
In redoutyng of mars and of his glorie /
Now to þe temple of Diane þe chaste
As schortly as I can I wol me haste
1195
To telle ȝou aƚƚ þe discripcioū
Depeynted ben þe walles vp and doū
Of huntyng and of schamefast chastite
Ther saugh I how woful Calistope
Whan þat Diane agreued was with here
1200
Was torned fro a wōman til a bere /
And after was sche maad þe loode sterre
Þus was sche peynted I can ȝou seye no ferre
Hire sone is eek a sterre as men may se
Ther saugh I dane torned til a tree
1205
I mene nat þe goddesse Diane
But Penneus doughter which þat highte Dane
¶ Ther saugh I Accheon an herte y maked
For vengance þat he saugh Diane al naked
I saugh how þat his houndes haue him caught
1210
And freten him for þat þei knewe him naught
Yet ypeynted was a litel forþere more /
How atthalance hounted þe wilde bore
And Meliagre and many anoþer mo
For which Diane wrought him care and wo
1215
Ther saugh I many anoþer wonder storie /
The which me list nat drawe to memorie /
¶ This goddess on an hert ful wel hiegh seet
Wiþ smale houndes aƚƚ aboute hir feet
And vnder neþe hire feet sche hadde a moone
1220
Wexynge it was and schulde wanye soone
In gaude greene hir statue cloþed was
Wiþ bowe in honde and arwes in a caas
Hir eyhen caste sche ful lowe a doun
Ther Pluto haþ his derke regioun
1225
A wōman trauaillynge was hire biforn
But for hire childe so longe was vnborn
Ful pitously lucyna gan sche calle