The Friar's Tale
Folio 120r
10 of 11 folios
Kyþe ȝoure almesse on me pouere wrecche
310
Nay þanne quod he þe foule feend me fecche
If I þe excuse þougħ þou scholde be spilt
Allas quod sche god wot I haue no gilt
Pay me quod he or by þe swete seint anne
As I wol bere a way þy newe panne /
315
For dette which þou owest me of old
Whan þat þou madest þin housbond kukkewold
I preyde at home for þy correccioū
Thow lixt quod sche by my sauacioū
Ne was I neuer or now wydewe ne wijf
320
Somoned vnto your court in al my lijf
Ne neuer I nas but of my body trewe /
Vnto þe deuel blake and rowe of hewe
Yeue I þy body and my panne
And whan þe deuyl herde hir curse so
325
Vpon hir knees he seyde in þis manere
Now mabely myn owne mooder deere
It is ȝour wille in ernest þat ȝe seye
Þe deuel quod sche fette him or he deye /
And panne and panne and al but he wil him repente
330
Nay olde stot þat is not mȳ entente
Quoþ þis somnor for to repente me
For any þing þat I haue had of þe
I wolde I hadde þy smok and euery cloþ
Now broþer qd þe deuyl be nat wroþ
335
Þy body and þis panne is mȳ by right
Þou schalt wiþ me to helle yet to nigħt
Wher þou schalt knowen of oure priuete
More þan a mayster of diuinite
And wiþ þat word þis foule feend him hent
340
Body and soule he with þe deuyl went
Where þat somnors han here heritage
And god þat made after his ymage
Mankynde saue and gyde vs aƚƚ and some
And leeue þis somnour good man to bycome