The Knight's Tale
Folio 16r
18 of 42 folios
His lymes grete his braunes hard and stronge
His sholdres brode his armes round and longe
And as the gyse was in his contree
1280
Ful high vpon a chaar of gold stood he
Wyth foure white boles in the trays
In stede of cote armure ouer his harnays
Wyth nayles yelew and bryght as any gold
He had a beres skyn colblak for old
1285
His longe heer was kembed bi hynde his bak
As any rauenes fether it shoon for blak
A wrethe of gold arm gret of huge wyght
Vpon his heed set ful of stones bryght
Of fyne Rubyes and of dyamauntz
1290
Aboute his chaar ther wenten whyte Alauntz
Twenty and mo as grete as any steer
To hunten at the leon or the deer
And folowed him wyth mosel fast y bound
Colerd of gold and turrettes filed round
1295
An hundred lordes had he in his route
Armed ful wel wyth hertes sterne and stoute .
¶ Wyth arcite in stories as men fynde
The grete Emetryus the kyng of ynde
Vpon a steed bay trapped in steel
1300
Couered in cloth of gold diapred weel
Cam rydyng lik the god of armes Mars
His cote armure was of cloth of tars
Couched wyth perles white and round and grete
His sadel was of brend gold new y beete
1305
A mantelet vpon his sholder hangyng
Bret ful of Rubies reed as fyre sparklyng
His crispe heer lyk rynges was y ronne
And that was yelew and glittred as the sonne
His nose was heigh his eyen bryght citryn
1310
His lippes round his colour was sangwyn
A few fralenes in his face y spreynd
By twix yelew and som deel blak I meynd
And as a leon he his lokyng cast
Of fyue an twenty yere his age I cast
1315
His berd was wel by gonne for to spryng
His vois was as a trompe thonderyng