The Knight's Tale
Folio 15r
16 of 42 folios
Ther sagh I how woful Calistopee
Whan that dyane a greued was wt here
1200
Was torned from a womman til a bere
And aftyr was she maad the lode sterre
Thus was it peynted I kan sey yow no ferre
Hir sone is eke a sterre as men may see
¶ Ther saugh I dane y turned til a tree .
1205
I mene not the goddesse dyane
But penneus doughter which that hight dane .
¶ Ther saugh .I attheon an hert y maked
For vengeaunce that he saugh dyane al naked
I saugh how that this houndes haue him caught
1210
And Geten him for that thei knew him naught
¶ Yet peynted was a litel forthermore
How attalante hunted the wylde boore
And meleagree and many a nother moo
For which dyane wroght hym care and wo
1215
¶ Ther sagh I many another wonder storye
The which that me list not to drawe to memorie
¶ This goddesse on an hert ful hye sett
Wyth smale houndes al a boute hir feet
And vndernethe hir feet she had a moone
1220
Wexinge it was and shold wany soone
In gaude grene hir statue clothed was
Wyth bow in hond and arwes in a cas
Hir eyen caste she ful low a doun
Ther pluto hath his derke regioun
1225
¶ A womman trauaillyng was hir bi forn
But for hir child so longe was vnborñ
Ful pitously lucyna gan she calle
And seide helpe for thow mayst best of alle
Wel coude he peynte lyfly that it wroght
1230
Wyth many \a/ floryn he the hewes boght
¶ Now ben thise listes made and theseus
That at his gret cost arrayde thus
The temples and the theatre euery del
Whan it was doon him liked wonder wel .
1235
But stinte I wol of theseus a lyte
And speke of palamon and of arcite
¶ The day approcheth of hir retournyng