The Clerk's Tale
Folio 94v
10 of 35 folios
Thow louest me that wot I wel certeyn
310
And art my feithful liege man y bore
And al that liketh me I dar wel seyn
It liketh the and specyally ther fore
Telle me that poynt as I haue seyde bifore
If that thow wolt vn to that purpose drawe
315
To take me as for thin sone in lawe
This sodeyn cas the man astonyed soo
That reed he wax / abaist and al in quakynge
He stood vnneth seyde he wordes moo
But oonly thus lord quod he my wyllynge
320
Ys as ye wol ne ayayns your likynge
Y wolde no thing myn owne lord so deere
Ryght as yow list gouerneth this matere
Yit wol. I quod this Marquys softely
That in thi Chambre I. thow. and she
325
Haue a colacioun and wostow whi
For I wol aske if it hir wille be
To be my wif and rule hir after me
Al this shal be doon in thi persence
Y wol xxt speke out of thyn audience
330
And in hir chambre while thei were aboute
Hir tretee which as ye shal aftyr here
The peple cam in to the hous wyth oute
And wondredyn in how honest manere
Ententifly she kepte hir fadre deree
335
But vttrely grisildis wondre myght
For neuer erst ne saw she swich a syght
No wondre is though that she were astoned
To se so gret a geest come in that place
She neuer was to swich gestes woned
340
For which she loked wyth ful pale face
But shortly forth this Mater for to chase
Thise arn the wordes that the Marquys sayde
To this benygne verray feithful mayde .