The Franklin's Tale
Folio 132v
2 of 18 folios
Preye hire she go / no fastere cours than ȝe
I seye / preietħ ȝoure Suster that she goo
360
No fastere cours than ȝe / theise ȝeres twoo
Thanne shal she ben euene / at the fulle alwey
And spryng flood lastynge / bothe nygħt and day
And but she vouche saf / in swicħ manere
To graunte me / my souereigne lady deere
365
Preye hire to synken / euery Rokke a doun
In to hire owen derk / regioū
Vnder the ground / there Pluto dwelletħ Inne
Or neuere moo shal I / my lady wynne
Thy temple in delphos / wol I barfot seke
370
Lord Phebus / se the teeres on my cheke
And of my peyne / haue som compassioū
And witħ that word / in sorwe he fel a douñ
And longe tyme he lay fortħ / in a traunce
¶ His brother whicħ that knew / of his penaunce
375
Vp caugħte hī / and to bedde he hatħ hī brougħt
Dispeired in this trment / and Corrected from: in<nothing> in this thougħt
Late I this wooful creature / lye
Chese he for me / wheiþer he wol lyue or dye
¶ Arueragus witħ hele / and gret honour
380
As he that was / of Chyualrie the flour
Is comen hom / and othere worthy men
O bliful artow now / thow Dorigen
That hast thy lusty housbonde / in thyne armes
The fresshe knygħt / the worthy man of armes
385
That louetħ the / as his owne hertes lyf
No thyng list hī / to ben Ymagintyf
If any wygħt had spoke / whil he was oute
To hire of loue / he ne hadde of it / no doute
He nougħt entendetħ / to no swicħ matere
390
But dauncetħ Iustetħ / maketħ hire good chere
And thus in ioye and blisse / I late hem dwelle
And of the seke Aurelius / wol I telle
¶ In langour / and in turment furious
Two ȝere and more / lay wrecched Aurelius
395
Er any foot / he mygħt on erthe goon
Ne comfort in this tyme / had he noon
Saue of his brother / whicħ that was a clerk
He knew of al this woo / and al this werk
For to noon other creature / certeyn
400
Of this matere / he durst no word seyn
Vnder his brest / he bare it more Secree
Than euere dide Pamphilus / for Galathee
His brest was hole / witħ oute for to sene