The Knight's Tale
Folio 12v
37 of 54 folios
And how asseged was ypolyta
The faire hardie quene of Scithia
25
And of þe fest þat was att hir weddeynge
And of þe tempest at hire home comynge
Bot al þat þinge .I. mot at nowe for bere
.I. haue gode wote a large felde to ere
And weike bene þe Oxen in my plouhe
30
The remenant of þe tale is longe ynouhe
.I. wil not letten eke none of þis route
Latt euery felawe tel his tale aboute
And latt see nowe who schal þe soper winne
And þere .I. laft .I. wil aȝeine be ginne
35
¶ This Duc of whome .I. make mensioūe
Whan he was comen al most to þe toune
In aƚƚ his wele & his most pride
He was ware as he kast his yhe a side
Where þat þere kneled in þe hihe waie
40
A company of ladyes twey . & twaie
Iche after oþer cladde in cloþes blake
Bot suche a crye & suche a woo þei make
That in þis werlde is creature lyneynge
Þat herd suche a noþer weymentynge
45
And of þis crie þei nolde neuer stenten
Tiƚƚ þei þe reynes of his bridel henten
What folke bene ȝe þat att myne home comynge
Pertrbe so my fest wt cryinge .
Qd Theus haue ȝe so grete envie .
50
Of myne honor þat þus compleigne & crie
Or who haþ ȝow mysboden or offended
And telleþ me if it maie bene amended
And whi þat ȝe bene cloþed þus in blake
The eldest lady of hem al spake
55
Whan sche had swowned wiþ a dedely chere
That it was rewþe for to seen & here
¶ Sche seide lorde to whome Fortune haþ ȝiuen
Victorie & as a conqueroure to lyuen
Nat greueþ vs ȝowre honoure & ȝowre glorie
60
Bot we be seke ȝowe of socoure & of mercye
And haue merci on owre woo & owre distrisse
Some drope of Pyte þurgħ þi gentilisse
Vpon vs wricched wēmen latt ȝe faƚƚ
For certes lorde þare is none of vs aƚƚ
65
That sche ne haþe bne a Doches or a quene
Nowe bene we Cayteues as it is wele sene