The Pardoner's Prologue & Tale
Folio 203v
1 of 17 folios
615
Com forth sire hoost / and offre first anon
And thow shalt kisse / the Relikes euerychon
Ye for a grote / vnbokele anon thy purs
¶ Nay nay quod he / thanne haue I Cristes curs
Lat be quod he / it shal nat be so thee ich
620
Thow woldest make me kisse thyn olde breech
And swere it were / a Relyk of a Seint
Thogh it were / with thy fondement depeynt
But by the croys / which þt Seint Eleyne foond
I wold I hadde / thy coylons in myn hond
625
In stide of Relikes / or of Seintuarie
Lat cutte hem of / I wol thee hem carie
They shul be shryned / in an hogges toord
¶ This pardoner / answerde nat a word
So wrooth he was / no word ne wolde he seye
630
¶ Now quod oure hoost I wol no lenger pleye
With thee / ne with noon oother angry man
¶ But right anon / the worthy knyght bigan
Whan þt he saugh / þt al the peple lougħ
Namoore of this / for it is right ynougħ
635
Sire Pardoner be glad / and murye of cheere
And sire hoost that been to me so deere
I pray yow / þt ye kisse the Pardoner
And Pardoner / I pray thee / drawe thee neer
And as we diden / lat vs lawe and pleye
640
Anon they kiste / and ryden forþ hir weye
¶ Here is ended the Pardoners tale