The Knight's Tale
Folio 36v
49 of 58 folios
And hoom wente euery man / the righte way
1880
Ther was namoore / but fare wel haue good day
Of this bataille / I wol namoore endite
But speke of Palamon / and of Arcite
~ ¶ Explicit secunda pars ~
~ ¶ Incipit pars tercia & vltī~a ~
Swelleth the brest of Arcite / and the soore
Encreeseth at his herte / moore and moore
1885
The clothered blood / for any lechecraft
Corrupteth / and is in his bouk / ylaft
That neyther veyne blood / ne ventusynge
Ne drynke of herbes / may been his helpynge
The vertu expulsyf / or animal
1890
Fro thilke vertu / clepyd natural
Ne may the venym / voyden ne expelle
The pipes of his longes / gan to swelle
And euery lacerte / in his brest adown
Is shent with venym and corrupcioun
1895
Hym gayneth neither / for to gete his lyf
Vomyt vpward / ne downward laxatyf
Al is to brosten / thilke regioun
Nature / hath no dominacioun
And certeinly / ther nature wol nat werche
1900
Fare wel Phisyk. go ber the man to cherche
This al and som / þt Arcita moot dye
For which / he sendeth after Emelye
And Palamon / þt was his cosyn deere
Thanne seyde he thus / as ye shal after heere
1905
¶ Nat may the woful spirit in myn herte
Declare a point of alle my sorwes smerte
To yow my lady / þt I loue moost
But I byquethe / the seruice of my goost
To yow / abouen euery creature
1910
Syn þt my lyf / may no lenger dure
Allas the wo / allas the peynes stronge
That I for yow haue suffred / and so longe