The Tale of Gamelyn
Folio 59v
2 of 24 folios
Takeþ heed to þat on as wel as to þat oþer
40
Selde ȝe see ony Eyr helpen his broþer
¶ Þo leete þey þe knigħt lyen þat was nought in hele /
And wenten into counseil his londes for to dele /
For to delen hem alle . to oon þat was her þought
And for Gamelyn was ȝongest / he schuld haue nouȝt
45
Al þe lond þat þer was þey dalten it in two
And leeten Gamelyn þe ȝonge wiþoute lond go
And ech of hem seyde to oþer ful lowde
His breþeren migħt ȝeue him lond whan he good cowde
Whan þey hadde deled þe lond at here wille
50
Þey come aȝein to þe knight þer he lay ful stille
And tolden him anon rigħt / how þey hadden wrougħt
And þe knigħt þer he lay liked it right nought
Than seyde þe knight / by seynt Martyn
For al þat ȝe haue y doon ȝit is þe lond myn
55
For goddes loue neyhebours stondeþ aƚƚ stille
And I wil dele my lond / after my wille
Iohñ myn eldeste sone / schal haue plowes fyue
That was my fadres heritage whil he was on lyue
And my myddeleste sone / fyf plowes of lond
60
That I halp for to gete wiþ my right hond
And al myn oþr purchas / of londes and leedes
Þat I byqueþe gamelyn / and aƚƚ my goode steedes
And I byseke ȝow goode men þat lawe cōne of londe
For Gamelynes loue þat my queste stonde /
65
Thus dalte þe knight his lond by his day
Right on his deþ bed / sik þer he lay
And sone aftirward he lay stoon stille /
And deyde whan tyme com / as it was cistes wille
And anon as he was deed and vnder gras I graue
70
Sone þe elder broþer gyled þe ȝonge knaue
He took in to his hond / his lond as his leede
And Gamelyn himselfe / to clothen and to feede
He cloþed him and fed him yuel and eek wroþe
And leet his londes forfare and his houses boþe
75
His parkes and his woodes / and dede noþing wel
And seþþen he it abought on his faire fel