The Pardoner's Prologue & Tale
Folio 312r
15 of 16 folios
That to thȳ creatour whiche that the wrough
And with hise precious blood the bough
575
Thow art so fals & so vnkynde allas
Now goode men god for ȝeue ȝow ȝoure trespas
And ware ȝow frō the sȳne of aueryce
Myn holy pardoun may ȝow alle waryche
So that ȝe offere / noblis or starlyngis
580
Or ellys syluyr sponys brochis ryngis
Bowith ȝoure heed vndyr this holy bulle
Comyth vp ȝe wyuys offerith of ȝoure wolle
Ȝoure name I entere here in mȳ rolle a non
In to the blysse of heuene schul ȝe gon
585
I ȝow assoyle by myn heye power
Yow that wele offere as clene & eek as cleer
As ȝe weryn born & lo seris thus I preche
And Ihū cryst that is oure soulys leche
So graūte ȝow his his pardoū to resceyue
590
For that is best I wele ȝou nat disceyue
But seris on word forgat I in mȳ tale
I haue relikys & pardoū in myn male
As fayre as ony man in yngeland
Whiche were me ȝouyn by the popis hand
595
Ȝyf ony of yow wele of deuocyoū
Offeryn & han myn absolucioū
Comyth forth anon & knelyth here a doun
And mekely resseyuyth myn pardoun
Or ellis takyth pardoū as ȝe weende
600
Al newe & frosch at euery mylys ende
So that ȝe offere alwey newe & newe
Nobelis & penys whiche that been goode & trewe
It is an honour to eueriche that is here
That ye mowen haue a suffycient pardonere
605
To a soyle ȝow in cuntre as ȝe ryde
For auenture whiche that may be tyde
Perauenture there may falle on or two
Doun of his hors & breke his nekke a two
Loke which a seurete it is to ȝow alle
610
That I am in ȝoure felaueschepe I falle