The Monk's Tale
Folio 362v
22 of 22 folios
O worthy Petro kyng of Cipre also
That Alisaūdere wan by high maystrye
Ful manye an hethene wroughtist thow ful wo
700
Of whiche tweyne oune lyges hadde envie
And for no thyng but for thy chiualrye
They in thȳ bed han slayn the by the morwe
Thus can fortune / hire wheel gouerne & gye
And out of Ioye brynge men to sorwe
705
Of Melan grete xernabo Viscounte
God of delyt & schorge of lūbardye
Whi schulde I nough thȳ Infortune acoūte
Syn in estat thow clombȳ weere so hye
Thȳ brotherys sone that was thȳ double allye
710
For he thȳ nevew was & sone in lawe
With inne his prysoū made the to deye
But why ne how not I that thow weere slawe
Of the Erl hugelyn of pyre the langour
Theere may ne tunge telle for pite
715
But lytyl out of Pize stant a tour
In which tor in prysoū put was he
And with hȳ been hise lyte childere thre
The oldeste skarsely fyue ȝeer was of age
Allas fortune it was greet crewelte
720
Swiche bryddis to putte in swich a cage
Dampnede was he to deye in that prysoun
For Roger which that bischope was of Pyze
Hadde on hȳ mad a fals suggestioun
Thor the peple gan vp on hȳ ryse
725
And puttyn hȳ in prysoū in swich wyse
As ȝe han herd & mete & drynk he hadde
So smal that wol anethe it may suffyse
And there withal it was Ful poore & badde
And on a day by fel that in that hour ~
730
Whan that his meete / wont was to ben brought .