The Friar's Tale
Folio 231v
6 of 8 folios
215
Thow schalt here aftyrward myn broþer dere
Come / where þe nedyth not of me to lere
For þu schat by thyn owene experyence
Cūne in a chayer þāne rede þis sentēce
Bet þā virgilie whilis he wt on lyue
Or daūt also whils he was on lyue
For I wele holde cūpanye with þe
Til it be so þt þu for sake me
Nay quod þe somenour þt schal neuere be tyde
I am a ȝeman knowyn is ful wyde
Myn trouthe wele I holde myn leue broþer
As I am sworn and eche of vs tyl oþer
For to be trewe broþer in þis cas
230
And boþe we gon aboute oure purchas
Take þu þyn part of þt men wele þe ȝeue
And I schal mȳ þus may we boþe leue
And ȝif þt ony of vs haue more þā oþer
Let hȳ be trowe parte it wt his broþer
235
I graunte quod þe deuyl be myn fey
And with þt word þey ryde forth here wey
And ryȝt at þe enterynge at þe toūnys ende
To which þis somenour schop hȳ for to wēde
The saw a carte þt chargede was with hey
240
Which þt a Cartere drof forth in þe wey
Dep was þe weye for which þis cartere stod
The cartere smot and cryede as he were wood
Hayt skot hayt harad hat brok atonys
The fend quod he ȝow feche body & bonys
245
As ferforth as euere were ȝe folyd
So meche woo as I haue with ȝow tholyd
The deuyl haue al boþe hors & carte & hey
The somenour seyde here schul we haue a pley
And ner þe frere he drow as nouȝt ne were
250
Ful piuyly & roūnede in his ere
Herke mȳ broþer herke be thȳ feith
Heryst þu nought how þe cartere seyth
Hende it a non for he hath ȝouē it þe
Boþe hey & carte & ek hise capillis thre