The Canon's Yeoman's Tale
Folio 384v
2 of 19 folios
Not nedyth it for to reherse hē alle
Wateris rubifyinge & bolis galle
Arsenyk Galarmomak & bronston
80
And erbis coude I telle ek manyon
Of Egremoyne walerian & lunarye
And othere sweche / If that me leste tarye
Oure laūpis brennȳge bothe nygh & day
To brynge a boute oure craft ȝif that we may
85
Oure furneys ek of Calcinacioū
And of oure wateris albifacacioū
Vnslekkid lym chalk & gleyer of an ey
Pouderis dyuerce Aschis donge / pisse & cley
Cerede pokettis sal petyr vitriole
90
And dyuerse feris mad of wode & cole
Sal tartere altaly / And Sal preparaat
And cōbust matiers / & coagulaat
Cley mad with hors heer or manis & oyle
Of Tartere Alūglas berme wort & argoyle
95
Roscalger & othere matieris enbibyng
And ek of othere matieris encorporyng
And of oure siluyr citrynacioū
Oure cymentȳge / & formentacyoū
Oure ingotis testis & manyon mo
100
I wele ȝow telle as was me taught also
The foure spiritis & the bodyis seuene
By ordere as ofte herde I mȳ lord hē nemene
The fyrste spirit quyk siluys callid is
The secunde orpemynt & the thredde I wis
105
Sal Armonyak & the fourte brunston
The bodyis seuene lo hē ek here a non
Sol gold is & luna syluyr whe treepe
Mars yryn . Mercurie quik siluyr we clepe
Saturnus led & Iupiter is tyn
110
And Venus Copir be mȳ fadir kyn
This cursede craft who so wele excercyse
He schal no good han that hȳ may suffyse
For al the good he spēdyth theere a boute
He lese schal therof haue I no doute