The Shipman's Tale
Folio 147v
9 of 10 folios
And vp he gooth / and maketh it ful tougħ
380
¶ Namoore quod she / by god ye haue ynougħ
And wantownely agayn / wt hym she pleyde
¶ Til atte laste / this Marchant seyde
By god quod he / I am alitel wrootħ
With yow my wyf / al thougħ it were me looth
385
And woot ye why / by god as þt I gesse
That ye han maad / a manere straungenesse
Bitwixen me / and my cosyn daun Ioħn
Ye sholde han warned me / er I had gon
That he yow hadde / an hundred frankes payed
390
By redy tokene / and heeld hym yuele apayed
For þt I to hym spak of cheuyssaūce
Me semed so / as by his contenaūce
But nathelees / by god oure heuene kyng
I thoughte nat to axen hym no thyng
395
I prey thee wyf / as do namoore so
Telle me alwey / er that I fro thee go
If any dettour hath in myn absence
Ypayed thee / lest thurgħ xx thy necligence
I mygħte hym axe / a thing xx that he hath payed
400
¶ This wyf / was nat afered x / nor affrayed
But boldely she seyde / and that anon
Marie / I deffie / the false Monk daun Ioħn
I kepe nat of hise tokenes / neuer a deel
He took me certeyn gold / that woot I weel
405
What yuel thedam / on his Monkes snowte
For god it woot I wende wt outen doute
That he hadde yeue it me / by cause of yow
To doon ther with / myn honor and my prow
For cosynage / and eek for beele cheere
410
That he hath had / ful ofte tymes heere
But sith I se / I stonde in this disioynt
I wol answere yow / shortly to the poynt
¶ Ye han mo slakker dettours / than am I
For I wol paye yow / wel and redily
415
Fro day to day / and if so be I faille
I am youre wyf score it vp on my taille
And I shal paye / as soone as euer I may
For by my trouthe / I haue on myn array
And nat on wast bistowed euery deel
420
And for I haue / bistowed it so weel
For your honor / for goddes sake I seye
As be nat wrooth / but lat vs laugħe and pleye
Ye shal / my ioly body / haue to wedde
By god I wol nat paye yow but a bedde
425
Forgyue it me / myn owene spouse deere
Turne hiderward / and maketh bettre cheere