The Pardoner's Prologue & Tale
Folio 143r
1 of 14 folios
Com fortħ anon / and kneleth heer adoun
And mekely / receyueth my pardoun
Or elles / taketh pardoū / as ye wende
600
Al newe and fressħ / at euery Miles ende
So þt ye offren / alwey newe and newe
Nobles or pens / whiche þt be goode and trewe
It is an honour / to euerich that is heer
That ye mowe haue / a suffisant Pardoneer
605
Tassoille yow / in contree as ye ryde
For auentures / whiche þt may bityde
Parauenture / ther may fallen / oon or two
Doun of his hors / and breke his nekke atwo
Looke which a seuretee / is it to yow alle
610
That I am / in your felaweshipe yfalle
That may assoille yow / bothe moore and lasse
Whan þt the soule / shal fro the body passe
I rede / þt oure hoost heere shal bigynne
For he is / moost envoluped in synne
615
Com forth sir hoost and offre first anon
And thou shalt kisse / my Relikes euerychon
Ye for a grote / vnbokele anon thy purs
Nay nay quod he / thanne haue I cistes curs
Lat be quod he / it shal nat be so theecħ
620
Thou woldest make me / kisse thyn olde breecħ
And swere / it were a relyk of a Seint
Thougħ it were / w thy fundement depeint
But by the croys / which þt Seint Eleyne fond
I wolde / I hadde / thy coillons in myn hond
625
In stide of Relikes / or of Seintuarie
Lat kutte hem of / I wol with thee hem carie
They shul be shryned / in an hogges toord
¶ This Pardoner answerde nat a word
So wrooth he was / no word ne wolde he seye
630
¶ Now quod oure hoost I wol no lenger pleye
With thee / ne w noon oother angry man
But right anon / the worthy knyght bigan
Whan þt he saugħ / þt al the peple lougħ
Namoore of this / for it is rigħt ynougħ
635
Sir pardoner / be glad and myrie of cheere
And ye sir hoost / þt been to me so deere
I prey yow / þt ye kisse the Pardoner
And Pardoner / I prey thee / drawe thee neer
And as we diden / lat vs laugħe and pleye
640
Anon they kiste / and ryden forth hir weye
¶ Heere is ended the Pardoners tale ~