The Tale of Gamelyn
Folio 64(a)r
5 of 26 folios
Than seyde þe child yonge Gamelyn
Cristes curs mot þou haue broþer art þou myn
115
And if I schal algate be beten anon
Cristes curs mote þou haue but þou be þat oon
And anon his broþer in þe grete hete
Made his men to fette staues Gamelyn to beete
Whan þat euerych of hem hadde a staf I nomen
120
Gamelyn was war þo he seigħ hem comen
Tho Gamelyn seigh hem comen he loked ouer aƚƚ
And was war of a pestel stood vnder a waƚƚ
Gamelyn was light and þider gan he lepe
And drof aƚƚ his broþeres men right soone on an heepe
125
He loked as a leoū a layde on good won
Tho his broþer seigh þat he bigan to gon
He fleigh vp in til a loft and schette þe dore fast
Thus Gamelyn wiþ his pesteƚƚ made hem agast
Sōme for gamelynes loue and some for his eye
130
Aƚƚ þei drowen by halues þo he bigan to pleye
What now seyde Gamelyn yuel mot þou þee /
Wil ye bigynne contek and so soone flee
Gamelyn sougħt his broþer whider he was flowe
And saugh wher he loked out at a wyndowe
135
Broþer saide Gamelyn come a litel neer
And I wil teche þe a play atte Bokeleer
His broþer him answerde and sayde be seint Richere
Whil þe pestel is in þin hond I wol come no neer
Broþer I wil make þy pees I swere by cristes oore /
140
Cast a way þe pestel and wraþþe þe nomore
I moot neede sayde Gamelyn wraþþe me at oones
For þou wolde make þi men to breke my boones
Ne hadde I had mayn and migħt in myn armes
To haue hem driuen fro me þei wolde haue do me harmes
145
Gamelyn sayd his broþer be þou nought wroþ
For to see þe haue harm were me right loþ
I dide it nought broþer but for a fondyng
For for to loken or þou were strong & art so ȝing