The Tale of Gamelyn
Folio 63r
2 of 26 folios
Tho leeten þey þe knight lyen þat was not in hele
And wenten in to counseiƚƚ his londes for to dele /
For to delen hem aƚƚ to oon was here þought
And for gamelyn was yongest he scholde haue nougħt
45
Alle þe lond þat þer was þai dalten it it tuo
And leeten Gamelyn þe ȝonge wiþoute lond go
And ech of hem seyde to oþer ful loude
His breþeren mowe ȝiue him lond whan he good coude
Whan þei hadde deled þe lond at here wille
50
Thei camen to þe knight þere he lay ful still
And tolden him anon how þei hadden wrought
And þe knight þer he lay liked it right nought
Than seide þe knight by seint Martyn
For al þat ȝe haue don ȝit is þe lond myn
55
For goddes loue neighebours stondeþ aƚƚ stille
And I wol dele my lond right after my wille /
Iohñ myn eldeste sone schal haue plowes fyue
That was my fadres heritage whil he was on lyue /
And my myddelest sone fyue plowes of londe
60
That I halp for to geten with my right honde
And aƚƚ myn oþer purchas of londes and leedes
That I bequeþe Gamelyn and aƚƚ my goode steedes
And I beseke ȝou goode men þat lawe conne of londe
For Gamelynes loue þat my bequeste stonde
65
Thus dalte þe knight his lond by his day
Right on his deþ bedde sik þer he lay
And sone afterward he lay stoon stille
And deyde whan tyme com as it was cristes wille
Anon as he was deed and vnder gras graue
70
Sone þe oldere broþer gylede þe yonge knaue
He took in to his hond his lond and his leede
And Gamelyn himselue to cloþen and to feede
He cloþed him and fedde him yuel and eek wroþe
And leet his londes and his houses boþe
75
His parkes and his woodes and dede no þing wel
And sethen he it aboughte on his faire fel