The Physician's Tale
Folio 194r
3 of 10 folios
And tolde hire al þe cas as ȝe bifore
230
Han herd it nedeþ not to telle it more
Mercy deere fader quod þis mayde /
And wiþ þat word sche boþe hire armes layde
Aboute his necke as sche was woned to do
Þe teeres barsten out of hire eyen tuo /
235
And sayde goode fader schal I dye
Is þer no grace is þer no remedye
No certes deere douȝter mȳ quod he
Þanne ȝif me leue fader myn quod sche
My deþ to compleigne a litel space
240
For perde Ieffa ȝaf his douȝter grace
For to compleyne ar he hir slougħ allas
And god it wot noþing was hire trespas
But þat sche ran hire fader first to see
To welcome him wiþ gret solempnite
245
And wiþ þat word sche feƚƚ on swown anon
And after whan hir swownyng was agon
Sche riseþ vp and to hire fader sayde /
Blessed be god þat I schal deye a mayde
Ȝif me my deth er þat I haue a schame
250
Doþ wiþ ȝour child ȝour wil a goddes name
And wiþ þat word sche prayeþ him ful ofte
Þat wiþ his swerd he schulde hir smyte softe
And wiþ þat word on swoune doun sche fel
Hir fader wiþ ful sorweful herte and fel
255
Hire heed of smoot and by þe top it hente
And to þe Iuge he ȝaf it to persente
As he sat in his doom in consistory
Whan þe Iuge it say as saiþ þe story
He bad take him and honge him also faste
260
But rigħt anon al þe poeple in þraste
To saue þe knigħt for rouþe and for pite
For knowen was þe fooles Iniquite
The poeple anon hadde suspecte in þis þing
By maner of þis clerkes chalangyng