The Summoner's Tale
Folio 75v
4 of 16 folios
And spende hir good there as it is resonable
And there I sey our dame a where is she
90
¶ Yonde in the yerde I trow that she be
Seyde this man and she wil come anon
¶ Ey maister wilcome be ye bi seynt Ioħn
Seyde this wyf how fare ye hertily
¶ This frere aryseth vp ful curteysly
95
And hir enbraceth in his armes narwe
And kysseth hir swete and chircheth as a sparwe
Wyth his lippes dame quod he ryght wel
As he that is your seruant euerydel
Thanked be god that yow yaf sowle and lyf
100
Yit saugh I not this day so faire a wyf
In al the chirche god so saue me
¶ Ye god amende defautes syr quod she
Algates wel come be ye bi my feye
¶ Graunt mercy dame this haue I found alwaye
105
But of your gret goodnes bi your leue
I wolde pay yow that ye nat yow a greue
I wil wyth Thomas speke a litel throw
Thise curates ben ful negligent and slow
To grope tenderly a conscience
110
In shrift in perchyng ay is my diligence
And studie in Petres wordes and in poules
And walke and fissh cristen mennes soules
To yelde Iħu crist his propre rent
To sprede his word is al myn entent
115
¶ Now by your leue o dere maister quod she
Chideth him wel for seynt Trynyte
He is an angry man as a pissemyre
Though that he haue al that he can desire
Though I him wrye a nyght and make him warme
120
And on him ley my legge other myn arme
He groneth like our boor in our stye
Other disport of him ryght noon haue I
I may not plese him in no maner cas
O Thomas xo vous dye Thomas Thomas
125
This maketh the fende this most ben amended