The Summoner's Tale
Folio 74v
2 of 16 folios
Hir frendes sowles as wel old as yong
Ye whan that thei ben hastily I songe
Nought for to holde a perste Ioly and gay
20
He syngeth noght but o masse on a day
Delyuereth out quod he anon the saules
Ful hard it is wyth flesshe hook or wt aules
To ben I clawed or to brenne or bake
Now spede yow hastyly for cristes sake
25
And whan this frere had seyde al his entente
Wyth qui cum patre forth his wey he wente
¶ Whan folk in cherche had yeue him what hem lest
He went his wey no lenger wold he rest
With scrippe and tipped staf I tukked hye
30
In euery hous he gan to poure and prye
And beggeth mele and chese or elles corn
His felaw had a staf tipped wyth an horn
A peyre of tables al of yuory
And a poyntel polysshed fetisly
35
And wrote the names alwey as he stod
Of al folk that yaf him any good
Ascaunce that he wolde for him preye
Yeue vs a busshel whete malt or rye
A goddes kechel or a trippe of chese
40
Or elles what yow list we may not chese
A goddes halpeny or a masse peny
Or yeue vs of your braun yif ye haue eny
A dagoun of your blanket leue dame
Our sister dere lo here I wryte your name
45
Bacoun or beef or swich thing as ye fynde
A sturdy harlot went hem ay by hynde
That was her hoostes man and bare a sakke
And what men yaf hem leyde it on his bakke
And whan that he was out atte dore anon
50
He planed awey the names euerychon
That he biforn had wryten in his tables