The Second Nun's Tale
Folio 89r
15 of 16 folios
But thou maist seyn thi pinces han the maked
485
Ministre of deth for yif thou speke of moo
Thow liest for thi power is ful naked
Dowey thi boldnesse seide Almachius thoo
And sacrifise to goddes do or thou goo
I recche nat what wronge that thou me profre
490
For I can suffre it as a Philosophre
But thilke wronges may I not endure
That thou spekest of our goddes here quod he
Cecilie answerde o nyce creature
Thou seydest no worde syn thow spake to me
495
That I ne knew ther wyth thi nycetee
And what thou were in eny maner wyse
A lewde officere a veyn Iustise
Ther lakketh no thing to thin ouctour eyen
Thaugh thou nart blynde for thing that we seen alle
500
That is a stoon that men may wel espien
That ilke a stoon a god thou wolt it calle
I rede the lat thyn hond vpon hit falle
And taste it wel and stoon thou shalt it fynde
Syn that thou seest not wyth thin eyen blynde
505
It is a shame that the peple shal
So scoorne the and laugh at thi folye
For commuly men woot it wel ouer alle
That myghty god is in his heuenes hie
And thise ymages wel thou maist espie
510
To the ne to hemself mow nat profite
For in effect / thei be nat worth amyte
Thise and swich other seyde she
And he wex wroth and bad men shold hir lede
Hoom til hir hous and in hir hous quod he
515
Brenne hir ryght in abath wyth flambes rede
And as he bad ryght so was doon the dede
For in a bath thei gonnen hir fast shetten
And nyght and day gret fire thei vnder betten