The Miller's Tale
Folio 30r
3 of 18 folios
Vp on hir lendes ful of many a gore
Whit was hir smok and bronded al bifore
And ek by hynde on hir coler aboute
Of cole blak sylk wyth ynne and eke wt oute
55
The tapes of hir whit volupere
Were of the same sute of hir colere
Hir filet brood of silke set ful hye
And sikerly she had a lykorous eye
Ful smale I pulled were hir browes two
60
And thei were bent as blake as eny slo
She was ful blisful more on to see
Than is the new pere Ionet tree
And softer than the wolle is of a wether
And by hir girdil hangeth a purs of leder
65
Tasseld wyth silk and perled wyth latoū
In al this world to seken vp and doun
Ther nys no man that couth thenche
So gay apopelat or swich a wenche
Ful bryght was the shynyng of hir hew
70
Than in the tour the noble y forged new
But of hir song it was as loude and yerñ
As eny swalwe sittyng on the berñ
And ther to she koude skippe and make game
As any kid or calf folwyng his dame
75
Hir mouthe was swete as bragot or meth
Hir hord of appelles leyde in hey or heth
Wynsyng she was as is a Ioly colte
Long as a mast and vpryght as a bolte
A broche she bar vpon hir loue colere
80
As brod as is a boce of a bokelere
Hir shoon were lased on hir legges hye
She was a pimerole a pigges nye
For eny lord to liggen in his bedde
Or yit for eny good yeman to wedde
85
¶ Now syr and eft syr so bifel the cas
That on a day this hende Nicholas
Fel wyth this wyf to rage and pleye
Whil that hir husbond was at Osneye .