The Knight's Tale
Folio 161r
33 of 60 folios
And ryȝt so ferdyn þey wt Palamoū
1260
W hȳ þere wentyn knyghtys manyeon
Some wele ben armede in an habirioū
And in a brest plate & in a lyȝt Iopoun
And some wele haue a peyre platys large
And some wele haue a pruce schild or a targe
1265
Some wele ben armyd on hese leggys wel
And han an ax & some a mace of stel
There is non newe gyse that it nas old
Armede were þey as I haue ȝow told
Eueryche aftyr hese opynyoū
1270
Ther mayst þu sen / comynge wt palamoun
Ligurge hȳselue / the grete kyng of trace
Blak was hese berd / & manlyche was hese face
The Cerkelys of hese eyen / in hese hed
They glowedyn / by twethyn ȝelw & red
1275
And lyk a grefoun lokede he a boute
With kempe herys on hese browys stoute
Hese lemys grete / hese brawnys grete & stonge
Hese schuderys brode hese armys roūde & longe
And as the gyse was in his cuntre
1280
Ful heye vp on a char of gold stod he
W foure white bolys in the trays
In stede of hese cote armor ouer hese harneys
W naylys ȝelwe & bryghte as ony gold
He hadde a berys skyn / cole blak for old
1285
Hese longe her was kemb be hynde his bak
As ony rauenys fedyr it schon for blak
A wrethe of gold / arm gret of heuge weighte
Vp on hese hed set ful of stonys bryghte
Of fȳne rubeis & of dyamaūtys
1290
A boute hese char / there wente whyȝte Alauntis
Twenty & mo as grete as ony ster
To huntyn at the lyoū or the der
And folwede hȳ / wt mosel faste I boūde
Colerid of gold / & torettys fylede roūde