The Nun's Priest's Tale
Folio 192r
10 of 12 folios
330
And eke it is ny day / I may nat dwelle
Shortly I seye / as for conclusioū
That I shal han / of this auisioun
Aduersitee / and I seye forthermoore
That I ne telle / of laxatyues no store
335
For they ben venemous / I woot it wel
I hem deffye / I loue ħē neuere a del
¶ Now late vs speke of myrthe / & sthynte al this
Madame Partelote / so haue I blis
Of oo thyng / god hatħ sent me / large grace
340
For whan I se the beaute / of ȝoure face
Ȝe ben so scarlet reed / a boute ȝoure eyen
It maketħ al my drede / for to dyen
And whan I fele a nygħt / ȝoure softe syde
Al be it / that I may nat / on ȝow ryde
For þt oure perche / is maad so narwe allas
350
I am so ful of ioye / and of solas
That I deffye / bothe sweuene and dreem
And witħ that word / he fley doun fro the beem
For it was day / and eke his hennes alle
And witħ a chukke / he gan hem for to calle
355
For he had founde a corn / lay in the ȝerd
Real he was / he was nomore a ferd
He fethered Pertelote / twenty tyme
And tradde hire eke / as ofte / er it was pime
He loketħ as it were / a grym leoun
360
And on his toos / he rometħ vp & doun
Hī deyned nat to sette / his feet to gounde
And chukketħ / whan he hatħ / a corn I founde
And to ħī rennen thañe / hise wyues alle
Thus real / as a Pince is / in his halle
365
Leue I this Chaunteclere / in his pasture
And after wol I telle / his auenture
¶ Whan þt the monthe / in whicħ the world bygan
That higħte Marche / whan god first maked man
Was complet / and I passed were also
370
Syn Marcħ bygan / thretty dayes & two
Bifel that Chauntecler / in al his pride
His wyues seuene / walkyng ħī beside
Caste vp his eyen / to the brigħt sonne
That in the signe of Taurus / hadde ronne
375
Twenty degrees and oon / and somwhat more
He knew by kynde / and by noon oþer loore